త్రైలోక్య మంగళ లక్ష్మీ స్తోత్రం
(Trailokya Mangala Lakshmi Stotram)
అథ త్రైలోక్య మంగలాత్మకం నామ లక్ష్మీస్తోత్రప్రారంభః ।
నమః కల్యాణదే దేవి నమోఽస్తు హరివల్లభే ।
నమో భక్తప్రియే దేవి లక్ష్మీదేవి నమోఽస్తు తే ॥1॥
నమో మాయాగృహీతాంగి నమోఽస్తు హరివల్లభే ।
సర్వేశ్వరి నమస్తుభ్యం లక్ష్మీదేవి నమోఽస్తు తే ॥2॥
మహామాయే విష్ణుధర్మపత్నీరూపే హరిప్రియే ।
వాంఛాదాత్రి సురేశాని లక్ష్మీదేవి నమోఽస్తుతే ॥3॥
ఉద్యద్భానుసహస్రాభే నయనత్రయభూషితే ।
రత్నాధారే సురేశాని లక్ష్మీదేవి నమోఽస్తుతే ॥4॥
విచిత్రవసనే దేవి భవదుఃఖవినాశిని ।
కుచభారనతే దేవి లక్ష్మీదేవి నమోఽస్తుతే ॥5॥
సాధకాభీష్టదే దేవి అన్నదానరతేఽనఘే ।
విష్ణ్వానందప్రదే మాతర్లక్ష్మీదేవి నమోఽస్తు తే ॥6॥
షట్కోణపద్మమధ్యస్థే షడంగయువతీమయే ।
బ్రహ్మాణ్యాదిస్వరూపే చ లక్ష్మీదేవి నమోఽస్తు తే ॥7॥
దేవి త్వం చంద్రవదనే సర్వసామ్రాజ్యదాయిని ।
సర్వానందకరే దేవి లక్ష్మీదేవి నమోఽస్తు తే ॥8॥
పూజాకాలే పఠేద్యస్తు స్తోత్రమేతత్సమాహితః ।
తస్య గేహే స్థిరా లక్ష్మీర్జాయతే నాత్ర సంశయః ॥9॥
ప్రాతఃకాలే పఠేద్యస్తు మంత్రపూజాపురఃసరం ।
తస్య చాన్నసమృద్ధిః స్యాద్వర్ద్ధమానో దినేదినే ॥10॥
యస్మై కస్మై న దాతవ్యం న ప్రకాశ్యం కదాచన ।
ప్రకాశాత్కార్యహానిః స్యాత్తస్మాద్యత్నేన గోపయేత్ ॥11॥
త్రైలోక్యమంగలం నామ స్తోత్రమేతత్ప్రకీర్తితం ।
బ్రహ్మవిద్యాస్వరూపంచ మహైశ్వర్యప్రదాయకం ॥12॥
పఠనాద్ధారణాన్మర్త్యస్త్రైలోక్యైశ్వర్యవాన్భవేత్ ।
యద్ధృత్వా పఠనాద్దేవాః సర్వైశ్వర్యమవాప్నుయుః ॥13॥
బ్రహ్మా విష్ణుశ్చ రుద్రశ్చ ధారణాత్పఠనాద్యతః ।
సృజత్యవతి హరత్యేవ కల్పేకల్పే పృథక్పృథక్ ॥14॥
పుష్పాంజల్యష్టకం దేవ్యై మూలేనైవ పఠేత్తతః ।
యుగకాలకృతాయాస్తు పూజాయాః ఫలమాప్నుయాత్ ॥15॥
ప్రీతిమన్యోన్యతః కృత్వా కమలా నిశ్చలా గృహే ।
వాణీ వక్త్రే వసేత్తస్య సత్యం సత్యం న సంశయః ॥16॥
అష్టోత్తరశతంచాస్య పురశ్చర్యావిధిః స్మృతః ॥17॥
భూర్జే విలిఖ్య గులికాం స్వర్ణస్థాం ధారయేద్యది ।
కంఠే వా దక్షిణే వాహ్యౌ సోఽపి సర్వతపోమయః ॥18॥
బ్రహ్మాస్త్రాదీని శస్త్రాణి తద్గాత్రం ప్రాప్య పార్వతి ।
మాల్యాని కౌసుమాన్యేవ భవంత్యేవ న సంశయః ॥19॥
అస్యాపి పఠనాత్సద్యః కుబేరోఽపి ధనాధిపః ।
ఇంద్రాద్యాః సకలా దేవా ధారణాత్పఠనాద్యతః ॥
పుష్పాంజల్యష్టకం దేవ్యై మూలేనైవ సకృత్పఠేత్ ।
సంవత్సరకృతాయాస్తు పూజాయాః ఫలమాప్నుయాత్ ॥21॥
యో ధారయతి పుణ్యాత్మా త్రైలోక్యమంగలం త్విదం ।
స్తోత్రంతు పరమం పుణ్యం సోఽపి పుణ్యవతాం వరః ॥22॥
సర్వైశ్వర్యయుతో భూత్వా త్రైలోక్యవిజయీ భవేత్ ।
పురుషో దక్షిణే బాహౌ నారీ వామభుజే తథా ।
బ్రహ్మాస్త్రాదీని శస్త్రాణి నైవ కృంతంతి తం జనం ।
పఠేద్వా ధారయేద్వాపి యో నరో భక్తితత్పరః ॥24॥
ఏతత్తు స్తోత్రమజ్ఞాత్వా యోఽర్చయేజ్జగదీశ్వరీం ।
దారిద్ర్యం పరమం ప్రాప్య సోఽచిరాన్మృత్యుమాప్నుయాత్ ॥25॥
యః పఠేత్ప్రాతరుత్థాయ సర్వతీర్థఫలం లభేత్ ।
యః పఠేదుభయోః సంధ్యోత్తస్య విఘ్నో న విద్యతే ॥26॥
ధారయేద్యః స్వదేహే తు తస్య విఘ్నం న కుత్రచిత్ ।
భూతప్రేతపిశాచేభ్యో భయస్తస్య న విద్యతే ॥27॥
రణే చ రాజద్వారే చ సర్వత్ర విజయీ భవేత్ ।
సర్వత్ర పూజామాప్నోతి దేవీపుత్ర ఇవ క్షితౌ ॥28॥
ఏతత్స్తోత్రం మహాపుణ్యం ధర్మకామార్థసిద్ధిదం ।
యత్ర తత్ర న వక్తవ్యం గోపితవ్యం ప్రయత్నతః ॥29॥
గోపితం సర్వతంత్రేషు సారాత్సారం ప్రకీర్తితం ।
సర్వత్ర సులభా విద్యా స్తోత్రమేతత్సుదుర్లభం ॥30॥
శఠాయ భక్తిహీనాయ నిందకాయ మహేశ్వరి ।
న్యూనాంగే అతిరిక్తాంగే క్రూరే మిథ్యాభిభాషిణే ॥
యత్ర తత్ర న వక్తవ్యం మయా తు పరిభాషితం ।
దత్వా తేభ్యో మహేశాని నశ్యంతి సిద్ధయః క్రమాత్ ॥32॥
మంత్రాః పరాఙ్ముఖా యాంతి శాపం దత్వా సుదారుణం ।
అశుభంచ భవేత్తస్య తస్మాద్యత్నేన గోపయేత్ ॥33॥
గోరోచనాకుంకుమేన భూర్జపత్రే మహేశ్వరి ।
లిఖిత్వా శుభయోగే చ బ్రహ్మేంద్రౌ వైధృతౌ యథా ॥
కుమారీం పూజయిత్వా తు దేవీసూక్తం నివేద్య చ ।
పఠిత్వా భోజయేద్విప్రాంధనవాన్వేదపారగాన్ ॥35॥
మాసమేకం పఠేద్యస్తు ప్రత్యహం నియతః శుచిః ।
దివా భవేద్ధవిష్యాశీ రాత్రౌ భక్తిపరాయణః ।
తస్య సర్వార్థసిద్ధిః స్యాత్ సత్యంసత్యం మహేశ్వరి ॥37॥
షట్సహస్రప్రమాణేన ప్రత్యహం ప్రజపేత్సదా ।
షణ్మాసైర్వా త్రిభిర్మాసైః ఖేచరోభవతి ధ్రువం ॥38॥
అపుత్రో లభతే పుత్రమధనో ధనవాన్భవేత్ ।
అరోగీ బలవాంస్తస్య రాజా చ దాసతామియాత్ ॥39॥
య ఏవం కురుతే ధీమాన్స ఏవ కమలాపతిః ।
స ఏవ శ్రీమహాదేవస్తస్య పత్నీ హరిప్రియా ॥40॥
బహునా కిమిహోక్తేన స్తవస్యాస్య ప్రసాదతః ।
ధర్మార్థకామమోక్షంచ లభతే నాత్ర సంశయః ॥41॥
ఇతి తే కథితం దేవి త్రైలోక్యమంగలాభిధం ।
లక్ష్మీస్తోత్రం మహాపుణ్యం సంసారార్ణవతారకం ॥42॥
ఋజవే సుచరిత్రాయ విష్ణుభక్తిపరాయ చ ।
దాతవ్యంచ ప్రయత్నేన పరమం గోపనం త్విదం ॥43॥
॥ ఇతి శ్రీశంకరభాషితం త్రైలోక్యమంగలనామకలక్ష్మీస్తోత్రం సంపూర్ణం ॥
.png)
.png)